Жорий мавсумда ўз олдига юксак мақсадлар қўйган “Навбаҳор” ПФК хориж клублари билан ҳам ҳамкорлик соҳасида ҳам самарали фаолият олиб бормоқда.

Жумладан, куни кеча клуб раҳбарияти собиқ иттифоқ ва Россия футболида ўз ўрни ва обрўсига эга бўлган, жаҳон футболига кўплаб маҳоратли футболчиларни етказиб берган, янги мавсумни Россия Премьер-лигасида бошлайдиган Москванинг “Торпедо” клуби раҳбарияти билан учрашишди.

Учрашув давомида ҳар икки клуб вакиллари турли йўналишлар, шу жумладан, клуб академиялари, ҳар икки жамоа  мураббий ва футболчилари борасида тажриба алмашиш, ўзаро назорат ўйинлари ўтказиш ва бошқа масалалар бўйича ҳамкорлик борасида келишувга эришишди.

Шунингдек, учрашув давомида “Торпедо” клуби вакиллари "Навбаҳор"нинг сербиялик 29 ёшли тажрибали ҳужумчиси Зоран Марушичга қизиқиш билдиришди.

Марушичнинг трансфер нархи бўйича келишувга эришилса, сербиялик форвард янги мавсумни “Торпедо” жамоасида бошлаши ҳам эҳтимолдан холи эмас.

“Навбаҳор” ПФК матбуот хизмати