Про лиганинг навбатдаги туридан ўрин олган "Машъал" — "Янгиер" (1:0) учрашувидан сўнг меҳмонлар бош мураббийи Диёр Мирзабоев фикрларини билдирди.

— Аввало узоқ масофа босиб келган мухлисларимизга миннатдорчилик билдираман. Ўйинга келсак, ҳозир асабий ҳолатда кўп вазиятларни эслай олмайман. Яхши инфратузилмага эга жамоага қарши ўйнадик. Голни оддий ҳолатда ўтказиб юбордик. Иккинчидан, бизда ҳам вазиятлар бўлди. Гол уришига қийналмоқдамиз. Ҳеч қайси футболчи атайин гол урмайман, демайди. Аламли мағлубият. "Машъал" бегона эмас, шу ерни нонини еганман. Олдинда ўйинлар етарлича. Вазиятни ўнглай оламиз. Мақсадимиз кучли бешликка кириш. Голда эса диққатни йўқотдик. Марказий ҳимоячилар эътиборни кўздан қочирди. Фикрим шундай.

— Клубда молиявий ҳолат қандай?
— Мен келгунимга қадар оқсаш бўлиб турганди. Яқинда вилоят ҳокими қабулида бўлдик. Ҳомийлар бириктирилди. Битта одамга қийин. Ҳозирги кунда 2та мукофот пулидан қарздорлик бор. Шароит фақат футбол учун хизмат қилмоқда. Ишончларни оқлашга ҳаракат қиламиз.

— Захирадан тушган футболчилар қанчалик ўзларини оқлашди?
— Вазиятлар билан, голли вазиятни фарқи бор. Захирадан тушганлар ўйинни кучайтира олишди. Лекин натижа яхши бўлмади.