“Сонгнам Илхва Чонма” – “Бунёдкор” учрашувидан кейин айни пайтда терма жамоа лагерида бўлган сардоримиз Виктор Карпенконинг фикрлари билан қизиқдик.

- Кайфиятим жудаям аъло. Ғалаба билан барча жамоадошларимни, “Бунёдкор”га бефарқ бўлмаганларни ва барча юртдошларимизни муборакбод этмоқчиман, - деб ўз фикрларини бошлади Виктор Карпенко.

- ТВ орқали ўйинни томоша қилиш қандай экан?
- “Бунёдкор” иштирокидаги ўйинни биринчи бор тўғридан-тўғри эфирда кузатишим. Бунгача ҳар сафар жамоам билан бирга бўлиб келганман. Очиғини айтсам, ойнаи жаҳон қаршисида баҳсни кузатиб бориш қанчадан-қанча асабларимни олди (кулади). Ундан кўра майдонда бўлиш осонроқ экан.

- Бугунги ғалабада қайси футболчини эътироф этган бўлардингиз?
- Сўзсиз – Игнатий Нестеровни! У камида уч маротаба юз фоизли голли вазиятларни қайтариб қолди. Дарвозабон – ярим жамоа деганларидек, Нестеров бугун “Бунёдкор”нинг ҳақиқий етакчиси бўлди.

- “Бунёдкор”нинг ўнг қанотига мослаштирилган Дэвид Карнининг ҳаракатларига қандай баҳо берасиз?
- У чапақай футболчи. Шу боисдан ҳам у барибир марказ томон интилаверди. Шундай пайтларда ҳужумкор ҳимоячи Акмал Шораҳмедов олдинга ўтиб, Дэвиднинг ўрнини ёпиб турди. Карни битта хавфли вазият яратишдан ташқари, бир неча бор рақиб футболчиларини ўзи билан овора қилиб юрди. Умуман олганда, барча футболчиларга раҳмат айтиш керак. Бундай масъулиятли ўйин давомида кучли босим остида бўлишларига қарамасдан ғалабани ўз қўлларида ушлаб қолишди.

- “Бунёдкор” шарқий минтақада иштирок этишига қарамасдан ўта ишончли тарзда чорак финалга йўлланма олди. Айтингчи, Миржалол Қосимов шакллантираётган бу жамоанинг асосий кучи нимада?
- Ҳамжиҳатликда!

- Ушбу ғалабадан сўнг Игнатий Нестеров, Лутфулла Тўраев ва Артём Филипосян каби футболчилар терма жамоа лагерига ажойиб кайфиятда ташриф буюришади. Умуман, “Бунёдкор”нинг бугунги ғалабаси терма жамоа муҳитига таъсир кўрсатадими?
- Албатта. “Бунёдкор” Чемпионлар лигасида мамлакатимиз шарафини ҳимоя қилаяпти, буни унутиш керак эмас! Шундай экан, терма жамоадаги барча футболчилар ҳам бу клубимизнинг натижаларидан қувонишади.

Баҳодир МИРЗАЕВ суҳбатлашди.