Эрон Про-лигасида кумуш медални қўлга киритиб, келгуси мавсумда ОЧЛда ўйновчи табриз шаҳрининг "Тракторсози" клубини бошқарган Амир Ғалиноий яна Теҳроннинг "Истиқлол" клубига қайтди.
Бу Ғалиноийнинг "Истиқлол"га учинчи марта қайтишидир. У илк марта 2003 йилда Теҳрон клубини бошқарган ва 2006 йилда мамлакат чемпионлигини қўлга киритган эди.
49 ёшга кирган мутахассис икки мавсум миллий терма жамоага бош мураббий этиб тайинлангач, 2008 йилда яна Эронинг энг машҳур клубига қайтган ва дарҳол иккинчи чемпионлигини нишонлаган эди.
Сўнгра у Исфаҳоннинг "Сепоҳон" клубига ўтиб, икки бор олтин медалга эгалик қилди ва шундан сўнггина Табриз шаҳри клубига ўтган эди.
Эслатиб ўтамиз, Амир Ғалиноий "Истиқлол"ни бошқарган Парвиз Мазлумий ўрнига ўтиради.
