Чемпионатимизда юзага келган кичик танаффусдан фойдаланиб, кўпгина легионерлар ўз юртларига бориб келишмоқда. "Андижон"нинг тожикистонлик легионери Фарҳод Тоҳиров ҳам ўз юртига борди ва "Истравшан" - "Вахш" ўйинини мухлислар орасида томоша қилди.

— Фарҳод, сизни бу ерларга қандай шамоллар учирди?
— Йўловчи шамоллар (кулади). "Пахтакор"га қарши ўйинда жароҳат олгандим. Шунингдек, ҳозир Ўзбекистон чемпионатида танаффус эълон қилинган. Ўзбекистон терма жамоаси жаҳон чемпионатининг саралаш баҳсларида иштирок этади. Шунинг учун ушбу ўйинни кўришга келдим.

— Ўйин ёқяптими?
— "Вахш" яхшироқ ўйнамоқда. Жамоа ёш бўлишига қарамай, комбинацион ўйин кўрсатмоқда. "Истравшан" эса амбицияси юқори, ютқазишни истамайдиган, ўз мухлислари учун ўйнайдиган жамоа. Кўриб турганингиздек стадион тўлган ва мухлислар футболчиларни олдинга чорлашмоқда.

— "Андижон"нинг ҳам мухлислари кўпми?
— Стадионга 25 минг одам кетади. Марказий ўйинларимизга 20 минг мухлис ташриф буюради.

— Янги жамоангиз ёқяптими?
— Ҳа, яхши йигитлар ва яхши жамоа йиғилган.

— "Андижон"га ўтганингиздан афсусланмайсизми?
— Йўқ. У ерда чемпионат савияси юқори.

— Нечта гол урдингиз?
— Ҳозирча битта. Қувонарли томони, "Нефтчи"га урган голим бизга ғалаба келтирди.

— Жамоа олдига қандай вазифа қўйилган?
— Бешликка кириш. Тўғри, ҳозирги кунда 14та жамоа орасида 11-ўринни эгаллаб турибмиз. Мусобақа жадвалидаги ҳолатимизни яхшилаш учун қўлимиздан келган барча ишни қиламиз.