"Манчестер Юнайтед"нинг португалиялик ҳужумчиси Криштиану Роналду ўз жамоаси билан йиғинга учмади. Бироқ клуб 37 ёшли португалиялик тез орада жамоага қўшилишидан умид қилмоқда, деб хабар беради Sky Sports.
Роналду яқинда агентидан унга янги клуб топишни сўради, Криштиану бу ёзги трансфер ойнасида "Манчестер Юнайтед"ни тарк этмоқчи. Айни пайтда клуб футболчини ўзида сақлаб қолишга ҳаракат қилмоқда.
Олдинроқ Роналду оилавий муаммолар туфайли "Манчестер Юнайтед"нинг Таиланд ва Австралиядаги мавсумолди турнесини ўтказиб юбориши хабар қилинганди.
Ўтган мавсумда португалиялик футболчи "Манчестер Юнайтед" сафида барча мусобақаларда 39 та ўйинда майдонга тушиб, 24 та гол урди ва 3 та голли узатмани амалга оширди. Ҳужумчининг клуб билан шартномаси 2023 йилнинг 30 июнига қадар мўлжалланган.
