“Бунёдкор” – “Шўртан” учрашувидан кейинги матбуот анжуманига биринчи бўлиб меҳмонларнинг белоруссиялик устози ташриф буюрди.

- Кубок доирасидаги баҳс бўлганлиги учун сафарда гол уришимиз керак эди. 1:0 ёки 2:1 ҳисобидаги мағлубиятлар жавоб учрашуви олдидан ёмон натижа ҳисобланмайди. Шу боисдан ҳам ҳимояни мустаҳкам ушлаган ҳолда рақиб дарвозасини ишғол қилишимиз лозим эди. Афсуски, шогирдларим ҳаракатларида шижоатни кўрмадим. Ўйнашга хоҳишлари бўлмагандек кўринди. Ўйин охирларида ҳаракатларимизни анчайин сусайтирдик. Оқибатда “Бунёдкор” бундан унумли фойдаланиб қолди. “Ақлли жамоа рақиб хатосидан фойдаланади, тартибсиз клуб эса ўз ҳатоси эвазига ютқазади” деб айтилган гап бугун ўз исботини топди.
“Шўртан” таркибида 3-4 нафар футболчи ўз савиясида ўйин кўрсатди. Бироқ бошқалар умуман ўзларига ўхшашгани йўқ, - деди Игорь Николаевич.

- Футболчилар ўзаро тил бириктиришиб, ўйнамай қўйишади. Оқибатда мураббий жабр чекиб, истеъфо беради. “Шўртан”да бу ҳол кузатилмаяптими?
- Билмадим. Агар футболчилар мен билан ишламоқчи бўлишмаса олдимга келиб, юзимга айтишсин. Ўйин олдидан гаплашсанг ҳаммаси туппа-тузук футболчилардек кўринади. Майдонга чиқишгач эса тамомила бошқа ўйинчига айланишади.

- Бу мавсум “Бунёдкор” билан “Жар” стадионида икки бор кураш олиб бордингиз ва ҳар иккала ўйинда ҳам мағлубиятга учрадингиз – 0:2, 0:3. Умуман “қалдирғочлар” ҳақида қандай хулосаларга келдингиз?
- Савияли ва тажрибали футболчилардан ташкил топган ҳамда шаклланган жамоа. “Бунёдкор” ҳар сафар кучли ўйин кўрсатади.