"Ливерпуль" мураббийлар штаби ҳимоячи Трент Александр-Арнолднинг келажакда жамоа сардори бўлиш учун барча имкониятлари бор деб ҳисобламоқда.

Аввалроқ, инглиз клуби футболчилари сардорлик боғичини тақишга тайёр футболчига овоз беришганди. Ҳимоячи ушбу рўйхатда биринчилардан бўлди.

"15 ёшида ҳам у табиий техник истеъдодга эга эди. У менга ёқадиган барча фазилатларга эга эди: ғалабага бўлган муносабат, яхшиланишга бўлган иштиёқ, лекин баъзида унинг ҳис-туйғулари улардан устун бўларди", - деди "Ливерпуль" мураббийи Пеп Лейндерс.

Бироқ мураббийлар штаби ўтган йиллар давомида Александр-Арнолд ўзида етакчилик фазилатларини шакллантира олгани ва келажакда у бундан ҳам катта масъулиятни ўз зиммасига олишга тайёр эканини таъкидлади.

Футболчи ўтган мавсумда Премьер-лигада 32 та ўйинда майдонга тушиб, 2 та гол урди ва 12 та голли узатмани амалга оширди.