"Барселона"нинг собиқ ярим ҳимоячиси Жерар Лопес "ПСЖ" ҳужумчиси Лионель Мессининг Каталония клубига қайтиши мумкинлиги ҳақидаги фикрлари билан ўртоқлашди.

- Хави Лионель Мессини қайтаришни хоҳлаётганини эшитдингизми?

- Менимча, Лео кетиши биланоқ, “Барселона”дагиларнинг барчаси уни қандай қилиб тезроқ қайтариб олиш ҳақида ўйлашди. Месси "Барселона"нинг ҳақиқий рамзи, тарих одами. Хави уни қайтаришни хоҳлаётгани мен учун ажабланарли эмас. Бу муҳим воқеа бўлиши мумкин.

- Бу қанчалик ҳақиқат?

- Буни ҳукм қилиш мен учун қийин. Жоан Лапорта ҳам бу қайтишни жуда хоҳлайди, аммо клубдаги молиявий аҳвол осон эмас ва "ПСЖ" Мессини шундоқ текинга қўйиб юбормайди. Бир йилдан сўнг, Лео эркин агентга айланганда "Барселона"га қайтишига ишонаман.

- Футбол нуқтаи назаридан, бундай трансфер ёрдам берадими?

- Бу ҳатто муҳокама қилинмайди! Месси ҳар қандай жамоага фойдали бўладиган ажойиб ўйинчи. У билан ҳар қандай клуб усиз умуман бошқача кўринади. У қандайдир тарзда "Барселона" ривожланишига халақит бериши мумкин деб ўйламаслигингиз керак. Лео шу қадар даҳоки, у илгари ўйнаганидан бошқача ўйнай олади. У марказга яқинроқ ҳаракат қилади, ҳужумларни ташкил қилади, голларга ассистентлик қилади. У узоқ вақтдан бери ўзини Иньеста ёки Хави каби футболчи сифатида фаолиятини якунлашига яқинроқ кўраётганини айтиб келади ва шундай бўлади», - деди Лопес.

Олдинроқ "Барселона" бош мураббийи Хави Мессининг қайтиши ҳозирча имконсиз эканини айтган, аммо келажакда бу содир бўлиши мумкинлигини ҳам инкор этмаганди.

Эслатиб ўтамиз, Месси ўтган йилнинг август ойида испан клубидан "ПСЖ"га ўтган эди. 35 ёшли аргентиналик футболчи ўтган мавсумда Парижликлар сафида 34 та ўйинда майдонга тушиб, 11 та гол урди ва 15 та голли узатмани амалга оширди.

Мессининг Париж клуби билан амалдаги шартномаси келаси ёзгача амал қилади. Transfermarkt портали Аргентина терма жамоаси футболчисининг нархини 50 миллион еврога баҳоламоқда.