"Реал" ҳужумчиси Эден Азар Англия Премьер-лигасида қайси футболчига қарши ўйнаш унга энг қийин бўлган деган саволга жавоб берди.

“Мен учун энг қийини Кайл Уокерга қарши ўйнаш эди. У мендан кучлироқ ва тезроқ эди. Уни мағлуб этиш қийин эди", - деди Азар ESPN GB билан суҳбатда.

Азар 2012 йилдан 2019 йилгача "Челси"да ўйнаган. Лондон клуби сафида у барча мусобақаларда 352 та ўйин ўтказиб, 110 та гол урган ва 92 та голли узатмани амалга оширган. "Челси" таркибида форвард икки марта Англия чемпиони бўлди, Англия кубоги ва Лига кубогини қўлга киритди, икки марта Европа лигаси ғолибига айланди. 2014/15 йилги мавсумда Азар Премьер-лигада мавсумнинг энг яхши футболчисига айланди.

Азар 2019 йилда 115 миллион евро эвазига "Реал"га ўтган эди.