"Лион"нинг янги ҳужумчиси Александр Ляказетт клуб бош мураббийи Питер Бош билан жанжаллашиб қолди.
Франциялик ҳужумчи яқинда “Лион”нинг “Фейеноорд”га қарши мавсумолди ўйинида гол урди. Майдонда ишлар яхши кетаётганига қарамай, танаффус вақтида кийиниш хонасида футболчи ва мураббий ўртасида можаро келиб чиққан.
Foot Mercato хабарига кўра, Бош Ляказеттдан маълум бир позицияда ўйнашни сўраган, футболчи бунга амал қилмаган. Қизиғи шундаки, ҳужумчини жамоадошлари қўллаб-қувватлаган, уларнинг баъзилари на Бошнинг кўрсатмаларини, на ўйин режасини тушунмаган.
Ляказетт "Арсенал" билан шартномаси тугаганидан сўнг ушбу мавсум оралиғида "Лион"га кўчиб ўтди.
Ўтган мавсумда футболчи АПЛда 30та ўйинда майдонга тушиб, 4та гол урди ва 7та голга ассистентлик қилди.
