"Барселона"нинг янги ҳимоячиси Жюль Кунде "Севилья" мухлислари билан хайрлашди.
“Клубга келганимдан бери менга кўрсатган қўллаб-қувватлаш учун, севги учун, ҳамма нарса учун раҳмат. "Севилья" шарафини ҳимоя қилиш ва клуб либосини кийиш мен учун шараф бўлди”, - дейди Кунде.
Кунденинг қўшимча қилишича, у Андалусия клуби учун Чемпионлар лигасидаги илк ўйинини, Европа лигасидаги ғалабасини ва Испания клубидаги ўйинлари эвазига Франция терма жамоасига илк чақирувини абадий эслаб қолади.
Кунде "Севилья"га 2019 йилда "Бордо"дан келиб қўшилган ва жамоада уч йил ўйнаган.
Ўтган мавсумда футболчи Ла Лигада 32 та ўйинда майдонга тушиб, 2 та гол урди ва 1 та голли узатмани амалга оширди.
