"Челси" "Брайтон"нинг чап қанот ҳимоячиси Марк Кукурелльяни 50 миллион фунтга сотиб олишга яқин турибди.
Томас Тухелга футболчининг ўйинлари ёқади. Тухель Бен Чилуэллга чап қанотда кучли рақиб бўлишини хоҳлайди. Қолаверса, потенциал янги футболчидан чап марказий ҳимоячи сифатида фойдаланиш мумкин, деб ёзади The Guardian.
"Челси" Кукурелльяни "Хетафе"да ўйнаганидан бери диққат билан кузатиб келмоқда. Ҳозир клуб музокаралар муваффақиятли якунланишига умид қилмоқда. Кукуреллья ўзи ривожланиб, совринлар учун кураша оладиган жамоада ўйнашни хоҳлайди.
"Брайтон" ҳимоянинг марказида ҳам, чап қанотида ҳам ўйнай оладиган испаниялик 19 ёшли Леви Колуиллни шартномага киритишни сўраши мумкин. У ўтган мавсумда "Хаддерсфилд"да ижара асосида ўйнади.
Агар "Челси" ва "Брайтон"нинг Кукуреллья борасидаги музокаралар муваффақиятли якунланса, Лондон клуби Испанияга қайтмоқчи бўлган Маркос Алонсони "Барселона"га қўйиб юборади.
Сезар Аспиликуэтанинг келажаги "Челси" Андреас Кристенсен ва Антонио Рюдигер кетганидан кейин яна бир марказий ҳимоячи билан шартнома имзолашига боғлиқ. Бу ёзда Лондон клуби Калиду Кулибалини сотиб олди, аммо Жюль Кунде, Натан Акке ва Маттейс де Лигтлар учун курашда мағлуб бўлди.
"Челси" 21 ёшли ҳимоячи Уэсли Фофанага қизиқмоқда, бироқ "Лестер" 85 миллион фунт стерлингга таклиф қилишса, уни сотишга тайёр. Лондонликлар шунингдек, “Лейпциг” ҳимоячиси Йошко Гвардиол ва “Интер” вакили Дензел Дюмфриесларни ҳам нишонга олишган.
