А Серия дебютанти "Монца" клуби бош директори Адриано Галлиани "ПСЖ" ҳужумчиси Мауро Икардининг жамоага ўтиши мумкинлиги ҳақида фикр билдирди. Икарди бир неча ойдан бери А Сериянинг дебютанти сафига ўтиши мумкинлиги айтилмоқда.

"Билмайман, бугун трансферлар ҳақида гапиришни истамайман. Келажакда нима бўлишини кўрамиз", - деди Галлиани Football Italia билан суҳбатда.

Эслатиб ўтамиз, Икарди Франция чемпионатининг 1-тури доирасидаги "Клермон" жамоасига қарши ўйин қайдномасидан жой олмаган эди. Баъзи манбаларга кўра, аргентиналик футболчи рафиқаси Ванда Нара билан ажрашгани учун ўйинни ўтказиб юборган.

Икардининг ўзи аввал А Серияда "Интер" ва "Сампдория"да ўйнаган ва турнирда 120 дан ортиқ гол урган.