"ПСЖ" раҳбарияти ўзи ишонмайдиган футболчиларни ўринбосарлар таркибига юбориши мумкин, деб хабар беради Sport.fr, L'Equipe нашрига таяниб.
Манбага кўра, француз клуби Андер Эррера, Рафинья Алькантара, Юлиан Дракслер, Левен Курзава, Мауро Икарди, Тило Керер, Идрисса Гейе ва Эрик Эбимбени ўз режаларига киритмаган.
Қайд этилишича, агар ушбу футболчилардан бири клубни тарк этишдан бош тортса, "ПСЖ" уларни бешинчи дивизионда ўйнайдиган ўринбосарлар жамоасига юбориши мумкин. У ерда ҳаваскор ва ярим профессионал жамоалар, шунингдек, профессионал клубларнинг иккинчи жамоалари ўйнайди.
Аввалроқ, "ПСЖ" бош мураббийи Кристоф Галтье Икардини ўз режаларига киритмаганини айтганди. Унинг фикрича, ҳужумчи фаолиятини қайта бошлаш керак.
Франция чемпионатининг 1-турида “ПСЖ” “Клермон”ни 5:0 ҳисобида мағлуб этди. 13 август куни жамоа "Монпелье" билан ўйнайди.