“Манчестер Юнайтед” ҳужумчиси Криштиану Роналду томонидан телефони синдирилган аутизмли боланинг онаси Сара Келли португалиялик футболчи ва инглиз клубини судга бермоқчи, деб хабар бермоқда The Sun.

“Мен унинг қилган иши учун жавоб беришини истайман. Адолатга эришишнинг ягона йўли курашни давом эттиришдир”, деди аёл.

Ҳодиса АПЛнинг 2021/22 йилги мавсумининг 32-туридан ўрин олган "Манчестер Юнайтед" - "Эвертон" (0:1) учрашувидан кейин содир бўлган. Мағлубиятдан кейин Роналду мухлислар ёнидан ўтиб кетаётиб, улардан бирининг телефонини синдирган. Маълум бўлишича, онаси билан футболга келган 14 ёшли аутизм касаллигига чалинган Жей Хардинг.

Аёлнинг сўзларига кўра, Роналду нотўғри хатти-ҳаракати учун 200 фунт стерлинг миқдорида жаримага тортилиши керак.