Айни пайтда Япониядаги турнирда иштирок этаётган Ўзбекистон U-19 терма жамоасининг бош мураббийи Фарҳод Нишонов ЎФА расмий саҳифасига интервью берди:

Адаптация ҳақида
— Адаптация жараёнида бироз қийналдик. Бунинг сабаби, об-ҳаво билан боғлиқ. Чунки Япония ва Ўзбекистон иқлими анчагина фарқ қилар экан. Бу эса машғулотлар жараёнида ҳам бироз сезилмоқда.

Мусобақа ташкилотчилиги
— Шароитларга келадиган бўлсак, ташкилотчилар барчасини муҳайё қилиб беришмоқда. Машғулот майдончаларида ҳам барча нарса мавжуд. Умуман олганда, турнир яхши ташкил этилган. Барча жамоалар савияли ва кучли. Аввалги йиллари бизнинг ўрнимизга Бельгия ва Колумбия сингари жамоалар қатнашиб келган.

Рақиблар
— Жорий йилда эса Ўзбекистон ва Уругвай ёшлар жамоалари таклиф этилган. Бу албатта ёқимли ҳолат. Рақибларга ортиқча таърифни кераги йўқ. Япон ва уругвайлик футболчиларнинг нималарга қодирлигини биламиз. Боиси бу давлатлар жаҳон футболида ўз ўрнига эга ҳисобланади. Умуман олганда, бу каби юқори савияли жамоаларга қарши ўйнаш биз учун фойдали, — деди бош мураббий.

Маълумот учун, вакилларимиз «SBS кубоги»даги иштирокини эртага «Шизуока» клубига қарши ўйин билан бошлайди. Учрашув 13:30 да старт олади.