Ayni paytda Yaponiyadagi turnirda ishtirok etayotgan O‘zbekiston U-19 terma jamoasining bosh murabbiyi Farhod Nishonov O‘FA rasmiy sahifasiga intervyu berdi:

Adaptasiya haqida
— Adaptasiya jarayonida biroz qiynaldik. Buning sababi, ob-havo bilan bog‘liq. Chunki Yaponiya va O‘zbekiston iqlimi anchagina farq qilar ekan. Bu esa mashg‘ulotlar jarayonida ham biroz sezilmoqda.

Musobaqa tashkilotchiligi
— Sharoitlarga keladigan bo‘lsak, tashkilotchilar barchasini muhayyo qilib berishmoqda. Mashg‘ulot maydonchalarida ham barcha narsa mavjud. Umuman olganda, turnir yaxshi tashkil etilgan. Barcha jamoalar saviyali va kuchli. Avvalgi yillari bizning o‘rnimizga Belgiya va Kolumbiya singari jamoalar qatnashib kelgan.

Raqiblar
— Joriy yilda esa O‘zbekiston va Urugvay yoshlar jamoalari taklif etilgan. Bu albatta yoqimli holat. Raqiblarga ortiqcha ta’rifni keragi yo‘q. Yapon va urugvaylik futbolchilarning nimalarga qodirligini bilamiz. Boisi bu davlatlar jahon futbolida o‘z o‘rniga ega hisoblanadi. Umuman olganda, bu kabi yuqori saviyali jamoalarga qarshi o‘ynash biz uchun foydali, — dedi bosh murabbiy.

Ma’lumot uchun, vakillarimiz «SBS kubogi»dagi ishtirokini ertaga «Shizuoka» klubiga qarshi o‘yin bilan boshlaydi. Uchrashuv 13:30 da start oladi.