Суперлига 17-турининг эътиборли учрашувларидан бири Самарқандда «Динамо» ҳамда «Бунёдкор» ўртасида бўлиб ўтади.
Ким қандай ҳолатда?
«Динамо» жамоаси Суперлига 16-туридан кейин 7 очко жамғарган ҳолда 14-ўринни эгаллаб турибди. «Бунёдкор» эса 17 очко жамғарган ҳолда турнир жадвалида 9-ўринни эгаллаб турибди.
Ўзаро ўйинлар: 24-тўқнашув
«Динамо» ва «Бунёдкор» клублари Олий Лига тарихида ўзаро бугунгача 23 марта тўқнаш келган. Бугунги ўйин 24-тўқнашув сифатида тарихда қолади. Ўзаро учрашувлар тарихи статистикаси «Бунёдкор» устунлигини кўрсатмоқда. «Бунёдкор» 19та ўйинда ғолиб бўлган, 3та ўйин дуранг ҳисобида якунланган. «Динамо» ушбу рақибни ҳозиргача бир марта мағлуб этган – 2014 йилда Тошкентда Азамат Бобожоновнинг 90+4-дақиқада киритган голи эвазига. Самарқандда эса ҳозирча мағлуб эта олмаган.
Тўплар нисбатида ҳам устунлик «Бунёдкор» томонида - 46:13. Ўзаро ўйинларда «Динамо» 6, «Бунёдкор» эса 60 очкони қўлга киритган.
«Бунёдкор»нинг ўзаро ўйинларда қозонган энг йирик ғалабаси – 4:0га тенг. «Динамо»нинг ягона ғалабаси – 1:0.
Самарқандда бўлиб ўтган ўзаро сўнгги 7 учрашув:
26.08.2019 «Динамо» - «Бунёдкор» 1:2
12.10.2017 «Динамо» - «Бунёдкор» 0:2
12.10.2015 «Динамо» - «Бунёдкор» 1:1
06.04.2014 «Динамо» - «Бунёдкор» 0:2
18.04.2013 «Динамо» - «Бунёдкор» 0:3
21.05.2012 «Динамо» - «Бунёдкор» 0:1
15.04.2011 «Динамо» - «Бунёдкор» 0:1
Эски танишлар...
Бугунги кунда «Бунёдкор»да тўп сураётган Суҳроб Султонов ва Суҳроб Иззатов ўз вақтида «Динамо» сафида тўп сурган бўлса, «Динамо» таркибидан Евгений Чумак 2019 йилги мавсумда «Бунёдкор» шарафини ҳимоя қилган.
