«Ювентус» клуби ва Франция терма жамоаси ярим ҳимоячиси Поль Погба атрофида можароли шов-шувлар давом этмоқда.

Бир неча кун аввал футболчининг Матиас ижтимоий тармоқда видео мурожаат қолдирган. Унда Матиас Пол Погба, унинг агенти Рафаэл Пименти ва Килиан Мбаппега оид катта шов-шувларга сабаб бўладиган видео борлигини маълум қилган. Поль эса ушбу воқеа юзасидан полицияга мурожаат қилди.

Прокуратура «уюшган гуруҳ томонидан шантаж қилишга уриниш» бўйича иш қўзғаган. Get French Football News нашри хабарига кўра, 29 ёшли футболчини жорий йилнинг март ойида болаликдаги дўстлари ва икки нафар қуролланган шахс Париждаги уйга алдов йўли билан чақирган ва Полдан 13 миллион евро талаб қилган. Талончилар Погбага у профессионал футбол фаолиятини бошлагандан буён уларга ёрдам беришни тўхтатганини айтган.

Погбадан «кўрсатилган хизматлар» учун пул талаб қилинган — гўёки улар Полни 13 йил давомида яширинча қўриқлаб келган. «Ювентус» футболчисининг таъкидлашича, бундан кейин у акаси Матиас ва болаликдаги дўстлари томонидан таҳдидга учрай бошлаган. Шунингдек, ушбу хабарлар оқимида, гўёки Погба "сеҳргар"дан Килиан Мбаппени афсун қилиб қўйишини сўраганлиги ҳам айтилди. Футболчининг ўзи бу айбловни рад этган.

L’Equipe хабар тарқатишича, Мбаппе ва унинг атрофидагилар ушбу воқеаларни диққат билан кузатмоқда. Агар Погба "сеҳргарлар" хизматидан фойдалангани аниқланса, Мбаппе у билан Франция терма жамоаси сафида бирга тўп тепишдан бош тортмоқчи.

Эслатиб ўтамиз, ноябрь ойида Қатарда навбатдаги жаҳон чемпионати бошланади. Франция амалдаги чемпион сифатида мусобақада иштирок этади.