АҚШнинг Silver Lake хусусий сармоя компанияси Англиянинг “Манчестер Сити” футбол клубининг қўшимча 4,1 фоиз улушини Хитойнинг China Media Capital компаниясидан сотиб олди ва ўз улушини 14,5 фоизга оширди. Америкалик инвесторлар Англия клубининг City Football Group (СFG) компаниясидан кейин иккинчи энг йирик акциядорларига айланишди, деб ёзади Financial Times журнали.
Америкалик молиячиларнинг амалдаги келишуви Абу-Даби қироллик оиласи ва 2008 йилда “Манчестер Сити”ни сотиб олган ва беш йилдан сўнг CFG компаниясига асос солган миллиардер Шайх Мансур бин Заид Ал Наҳаён билан алоқаларини мустаҳкамлашга хизмат қилмоқда. Ҳозирда компания Австралия, Япония, Уругвай ва АҚШдаги футбол клубларига сармоя киритиб, дунёдаги энг йирик спорт клублари эгаларидан бири ҳисобланади.
