Левандовски янги мавсумни янги жамоада бошлади. У "Барселона" футболчисига айланди ва 13 август куни ўз дебютини ўтказди. Шундан сўнг, уни тўхтатиб бўлмаяпти. Гол машинаси ўз ишини қилмоқда. Қуйида Левандовскининг 1 ой давомида "Барселона"да қайд этган натижаларига тўхталиб ўтамиз.
2022 йилнинг июль ойида "Бавария" ўзи учун муҳим бўлган ҳужумчисини "Барселона"га сотади. Левандовскининг трансфер қиймати 45 миллион еврога баҳоланди. У Бундеслигада ўта катта фигура эди. Хусусан, польяк футболчиси сўнгги уч мавсумдан буён "Бавария" учун битта ўйинда ўртача, биттадан кўпроқ гол уриб келган. Май ойида эса Левандовски шундай деган: "Менинг "Бавария"даги ишим якунланди. Мен ортиқ бу ерда футбол ўйнай олмайман".
Ҳозирга қадар у "Барселона" сафида 8 та ўйинда иштирок этди. Улардан айримларида хет-трик қайд этишга эришди. Хави Левандовскининг "Виктория"га қарши қайд этган хет-тригидан кейин шундай деган эди: "Унинг даражасини эътироф этиш шарт эмас. У шунчаки голлар урмаяпти. Роберт қандай қилиб ҳаракатланиш, қайси жойда, қачон ва қай услубда туриш кераклигини яхши билади. Шу сабаб, натижа бизнинг фойдамизга ҳал бўлмоқда. Жуда хурсандман. У биз учун муҳим харид бўлди. Ҳужумдаги муаммоларнинг ягона ечими Робердир".
Роберт Левандовски "Элче" билан ўйинда дублга эришган эди. Қуйида ҳужумчи билан боғлиқ статистикалар баён этилади.
- Левандовски "Райо Вальекано" билан баҳсда гол ура олмаган. 0-0 билан тугаган баҳс ҳужумчи учун 6,41 баллга баҳоланган. Шундан кейин, у 8 та ўйинда 11 та гол уришга эришди.
- Левандовски жами 629 дақиқа давомида майдонда ҳаракат қилган. Бу эса ўртача ҳар 57,2 дақиқада битта гол деганидир.
- Польшалик футболчи голлардан ташқари 2 та ассист ҳам ижро этди. Бу эса унинг ҳар 48,4 дақиқада голда бевосита иштирок этаётганини билдиради.
- "Виктория"га қарши баҳсдаги хет-трик орқали Левандовски ЕЧЛ тарихида учта клубда хет-трик қайд этган илк футболчига айланди ("BVB", "Бавария", "Барселона").
- "Виктория"га қарши баҳс футболчининг ЕЧЛда икки ва ундан ортиқ гол урган 21 ўйини эди. Бу борада Роналду (31) ҳамда Месси (26) Левандовскидан устун холос.
- Роберт ЕЧЛ тарихидаги энг яхши тўпурарлар рўйхатида 86 та гол билан учинчи ўринга кўтарилди (Роналду - 140, Месси - 125).
- Левандовски олтита Ла-лига ўйинида саккизта гол урди.
- Ҳужумчи Испания ички чемпионатида учта ўйинда иккитадан гол уришга эришди.
- Левандовски бу мавсумда кучли бешлик чемпионатларида жами 10 тадан кўп гол урган тўртта футболчидан бирига айланди (Неймар, Мбаппе ва Холанд билан бирга).
- У "Барселона" сафида ўнг, чап ва бош билан гол уришга эришди. Шунингдек, у алоҳида-алоҳида баҳсларда битта, иккита ва учта голлар уришга улгурди.
- Ваниҳоят, 33 ёшли ҳужумчи "Who Scored" версиясига кўра, Ла-лиганинг олтита туридан тўрттасида энг энг яхши футболчи деб топилган.
Мана шундай ўзига хос натижаларга Левандовски бор-йўғи бир ой ичида эришди. Мавсумнинг катта қисми ҳали олдинда. Камига бизда Жаҳон чемпионати ҳам бор. Робертни кузатишда давом этинг!
ИСМАТОВ Ж.
