“Пахтакор” – “Навбаҳор” учрашувдан сўнг ташкил этилган матбуот анжуманида ҳар иккала жамоа бош мураббийлари ўйин ҳақидаги фикрлари билан ўртоқлашишди.

Мурод Исмоилов («Пахтакор» бош мураббийи): - Ёшлар ҳар доим бир текисда ўйнай олмайди. Бугун айнан шу ҳолатга гувоҳ бўлдик. Масалан, Искандеров иккинчи таймда ўзини кўрсата олмади. Ёшлар билан бундай вазият рўй бериб туриши табиий. Биринчи бўлимни яхши ўтказдик ва гол урдик. Лекин иккинчи таймда йўқ жойдан ўзимизга муаммо орттириб олдик. Жароҳатлар кўплиги туфайли таркибни тузишда қийинчиликларга дуч келдик. Шунингдек, баъзи ўйинчилар иштиёқсизлик билан ўйнагандек туюлди. Стадионга икки нафар мухлис келган тақдирда ҳам улар учун охиригача ўйнаш лозим. Бундай ҳолатни умуман кечириб бўлмайди. Танаффус даврида жамоа ўйин савиясини яхшилашга интиламиз.

Мустафо Байрамов («Навбаҳор» бош мураббийи): - Учрашувда яхши ҳаракат қилдик. Иккинчи бўлимда мезбонларга нисбатан фаолроқ ўйнаб, бир неча вазиятларни юзага келтирдик. Агар Косонсойда имкониятни бой бермаганимизда бугунги натижа билан кейинги босқичга чиқишимиз ҳам мумкин эди. Йигитларга эътирозим йўқ. «Пахтакор» эса хотиржамлик билан ўйнагандек таассурот қолдирди.