Европа футбол уюшмалари иттифоқи (УЕФА) яқин орада УЕФА Суперкубоги форматини ўзгартирмоқчи эмас. Бу ҳақда ташкилот президенти Александр Чеферин маълум қилди.
"Ҳозирча биз фақат УЕФА Суперкубогининг кенгайтирилиши ҳақида гаплашдик. Биз буни Европадан ташқарида қилиш ҳақида гаплашмадик. Бундан ташқари, улар у ерда ким ўйнаши кераклигини муҳокама қилишмади.
Масалан, агар тўртта жамоа бўлганида, Чемпионлар лигасидан иккита, Европа лигасидан ва Конференциялар лигасидан битта жамоа бўлармиди? Энг катта муаммо шундаки, бизда бу борада келишув йўқ. Клубларнинг қарашлари турлича, тақвим ниҳоятда тиғиз, ишлар дастлабки музокаралардан нарига ўтмаган. Ҳозирда бундай режаларимиз йўқ.
Шахсан менга Суперкубок каттароқ тадбир, футбол байрами бўлиши ғояси ёқади. Бу аёллар ва ёшлар Суперкубоги ва эҳтимол, Афсоналар ўйини ўз ичига олиши мумкин. Аммо мен бу ғояни амалга ошира олишимизга ҳали ишончим комил эмас”, — деди Чеферин RTV Slovenija билан суҳбатда.
Аввалроқ МЛС клублари УЕФА Суперкубоги иштирокчиларидан бирига айланиши мумкинлиги ҳақида хабар берилганди.
Эслатиб ўтамиз, бу йил УЕФА Суперкубоги учун ўйин ғолиби "Реал" бўлиб, Германиянинг "Айнтрахт" клубини мағлуб этганди.
