Хабарингиз бор, шу йилнинг август ойида Президентимиз Шавкат Мирзиёев Бекобод шаҳрига ташриф буюриб, «Металлург» футбол клуби қошида очилган «Эл Голазо» футбол академияси билан яқиндан танишган эди. Давлатимиз раҳбари футбол академиямизда яратилган шароитларни кўздан кечиргач, мутасаддиларга бу футбол мактаби тажрибасини оммалаштириш бўйича кўрсатма берганди.

Кеча Ўзбекистон футбол ассоциацияси мутасаддилари, Қорақалпоғистон Республикаси, вилоятлар ва Тошкент шаҳрида жойлашган футбол маҳорати мактаблари, ҳудудий футбол ассоциациялари, футбол клублари, академиялар директорлари ва мураббийлардан ташкил топган катта гуруҳ мазкур футбол мактаби ишини ўрганиш, унинг тажрибасини жойларда кенг тадбиқ этиш, оммалаштириш мақсадида «Эл Голазо» футбол академиясида бўлишди.

Маълумки, ушбу мактаб Испаниянинг таниқли «Реал Мадрид» клуби жамғармаси билан ҳамкорликда ташкил этилган бўлиб, ўтган йилнинг октябрь ойида фаолиятини бошлаган эди. “Металлург” футбол академиясининг ўқув-машғулотлари «Реал Мадрид» футбол клуби анъаналарига мос равишда олиб борилади. Ўз навбатида мураббийларнинг бир нечтаси айнан қироллик академияси тавсияси билан шаҳримизга келган  испаниялик мутахассислар ҳисобланади.

Ташриф давомида меҳмонлар мазкур ҳудудда жойлашган майдонлар, фитнес заллари, ўқув бинолари ҳамда ётоқхоналарда яратилган шароитлар билан яқиндан танишдилар. Ўқув-машғулотлари ва таълим жараёнларида иштирок этиб, мутахассис ҳамда мураббийлар билан суҳбатлашдилар. Ташриф якунида мутасаддиларга мазкур мактаб тажрибасини оммалаштириш юзасидан керакли маслаҳатлар бериб ўтилди.