"Реал Мадрид" бош мураббийи Карло Анчелотти "қаймоқранглилар" ҳужумчиси Карим Бенземанинг "олтин тўп" учун овоз беришдаги эҳтимолий ғалабаси ҳақида фикр билдирди.
“Умид қиламанки, у “олтин тўп”ни қўлга киритади. Карим уни қўлга киритса, барчамиз хурсанд бўламиз, чунки бу қайсидир маънода бутун "Реал"нинг ғалабаси", - дея италиялик мутахассиснинг сўзларини келтиради Transfermarkt.
Франциялик ҳужумчи совринга асосий давогар сифатида кўрилмоқда. "Олтин тўп" - France Football томонидан йилнинг энг яхши футболчисига бериладиган мукофот.
Ўтган мавсумда Бензема Ла Лига ва Чемпионлар лигасида 46 та ўйинда 44 та гол уриб, Европадаги асосий клублар мусобақасининг 5 карра ғолибига айланганди. Франциялик футболчи жорий мавсумда барча турнирларда 10 та ўйинда майдонга тушиб, 5 та гол урди.
