Бугун ЎФА биринчи вице-президенти Равшан Ирматов раислигида ҳудудларда футболни ривожлантириш бўйича олиб борилаётган ишлар, ўтказилган мусобақалар ва мавжуд камчиликлар таҳлилига бағишланган йиғилиш бўлиб ўтди.

Унда ЎФА раҳбарияти, футбол академиялари мутасаддилари, техник директорлари ва болалар-ўсмирлар футболи бўйича масъул мутахассислар иштирок этди.

Кун тартибига кўра, дастлаб “Профессионал футбол мактаблари” Ўзбекистон чемпионати учрашувлари таҳлилий маълумотлар асосида муҳокама қилинди. Мусобақа давомида йўл қўйилган камчиликлар қаттиқ танқид остига олинди ва мутасаддиларга огоҳлантириш берилди. Бу масалага жиддийроқ ёндашиш кераклиги, болалар футболига ҳар қачонгидан кўпроқ масъулият билан қараш шартлиги айтилди.

Жойлардаги футбол академиялари фаолияти, хусусан турли ёш тоифасидаги Ўзбекистон терма жамоалари ва клублар учун футболчиларни тайёрлаб бериш кўрсаткичлари таҳлил қилинди. Академия раҳбарларига мураббий ва селекционерлар фаолиятини мониторинг қилиш, машғулотларини назорат остига олиш, ёшлар таълим-тарбиясига жиддий эътибор қаратиш, ўтган мусобақаларни таҳлил қилиш, ўқув-йиғин машғулотларда йўл қўйилаётган хатоларни қайта кўриб чиқиш бўйича топшириқ берилди.

Бундан ташқари, терма жамоаларга футболчи етказиб бериш, мактаблардаги мавжуд шарт-шароитлар, мусобақалардаги иштирок ва футболчиларнинг тартиб-интизоми каби мезонлар асосида академияларнинг фаолиятини KPI-таҳлил орқали баҳолаш бўйича вазифа белгиланди.

Шунингдек, йиғилишда ёш футболчилар мақоми ва уларнинг клубларга кўчиб ўтишини тартибга солувчи ягона турдаги шартномани ҳуқуқий жиҳатдан ўрганиш ва қайта ишлаб чиқиш бўйича топшириқ берилди.

Ҳудудлардаги мутасаддилар ва йиғилиш иштирокчилари ечимини кутиб турган бир қатор масалалар ҳамда айрим вазифалар юзасидан ўз таклифларини билдириб ўтдилар. Учрашувда барча йўналишлар бўйича масъуллар белгиланиб, уларга тегишли топшириқлар берилди, ижро назорати эса доимий олиб борилиши маълум қилинди.