Жаҳон чемпионатлари тарихида кўплаб йирик ҳисоб қайд этилган ўйинлар бўлган. 2014 йилда Германия Бразилияни 7-1 ҳисобида доғда қолдиргани ҳамманинг ёдида бўлса керак. Шунингдек, сўнгги, Россияда ўтган мундиал ҳам бир нечта йирик ҳисобларга гувоҳ бўлган. Жумладан, Англия Панамани 6 та гол билан жазолаган (6-1). Бельгия ва Тунис ўртасидаги баҳс 5-2 ҳисобида тугаган. Мезбонлар эса очилиш учрашувида Саудия Арабистонини 5-0 ҳисобида мағлуб этганди. Қуйида шунга ўхшаш, аммо улардан йирикроқ бўлган мунидал ўйинларига назар ташлаймиз.
Венгрия 10 -1 Эл Сальвадор. (Испания-1982)
Ўз юртида фуқаролар уруши кетаётган бир пайтда Эл Салвадор Жаҳон чемпионатига йўл олади. Аммо бу жамоа мундиалда қатнашиш учун етарли кучга эга эмасди. Шу сабабдан Венгрия томонидан 10-1 ҳисобида мағлуб этилади. Аммо гуруҳ баҳслари сўнгида бу жуфтлик кейинги босқичсиз қолган. Чунки уларнинг гуруҳида Бельгия ва Аргентина бор эди.
Венгрия 9-0 Жанубий Корея (Швейцария-1954)
Ференц Пушкас 9 голнинг биринчиси ва сўнггисини уришга муваффақ бўлган баҳсда Корея шармандали мағлубиятга учрайди. Венгрия эса ўша йили финалгача етиб борган. Аммо улар Ғарбий Германия томонидан 3-2 ҳисобида мағлуб этилади.
Югославия 9-0 Конго ДР (Ғарбий Германия-1974)
Конго Демократик Республикаси ўша пайтларда Зоир деб аталарди. Африкаликлар гуруҳни Шотландияга 2-0 ҳисобидаги мағлубият билан бошлайди. Иккинчи турда эса Югославия томонидан тор-мор этилади.
Швеция 8-0 Куба (Франция - 1938)
Орадан узоқ йиллар ўтиб кетган бўлишига қарамай, 1938 йилда Швециянинг Куба устидан қозонган ғалабаси, мамлакат тарихидаги энг йириги бўлиб қолмоқда. Ярим финалда шимолликлар Кубани 8 та гол фарқи билан мағлубиятга учратади.
Уругвай 8-0 Боливия (Бразилия-1950)
Франция ўша йили турнирдан четлатилади. Шу сабабли французлар билан бир гуруҳдан жой олган Уругвай гуруҳда атиги битта ўйин ўтказади. Ўша баҳс Боливияга қарши кечади ва бу баҳс уругвайликларнинг даражасини намойиш этади. 1950 йилги мундиалнинг ғолиблиги ҳам турнир сўнгида Уругвайга насиб этган. Шундай қилиб, Уругвай ўз тарихидаги иккинчи ва ҳозирча сўнггиси бўлиб турган чемпионликни қўлга киритади.
ИСМАТОВ Ж.
