"Манчестер Юнайтед" ҳужумчиси Криштиану Роналду захирадан ўйинга тушишдан бош тортгани учун ва кийиниш хонасига кириб кетиб қолгани учун яқинда бир неча кунга жамоадан четлатилган эди. Португалиялик иккинчи марта майдонга тушишдан бош тортди. Аввалроқ, Роналду “қизил иблислар”нинг мавсумолди машғулотларига кечикиб келганди.
"Манчестер Юнайтед" афсоналари Криштиану Роналдунинг хатти-ҳаракати ҳақида турлича фикрда. Масалан, Уэйн Рунига португалиялик футболчининг бу ҳаракатлари ёқмади.
"Менимча, Криштиану Роналдунинг мавсум бошидан бери қилган ишлари "Манчестер Юнайтед" учун номақбул бўлди. Рой Кин уни ҳимоя қилганини кўрдим, лекин Ройнинг ўзи бундай нарсани умуман қабул қилмасди. Бу каби воқеалар "Манчестер Юнайтед" учун рўй бериши керак эмас" - деди Руни talkSPORT билан суҳбатда.
