«Манчестер Юнайтед»нинг собиқ футболчиси Уэйн Руни «қизил иблислар» бош мураббийи Эрик тен Хагнинг ишини юқори баҳолади.

«Менимча, у яхши ишлаяпти. У келиб, жамоани ким бошқаришини ойдинлаштирди. Ва бир неча йил ичида биринчи марта «Манчестер Юнайтед»нинг ўзига хос услуби борлигини кўряпман, охирги пайтларда бундай бўлмаган эди.

У Роналду билан вазиятни ҳал қилиб, ўз характерининг кучлилигини кўрсатди. Унга бу иш жуда мос келади.

Бу кўп вақтни талаб этади, лекин кучли тўртлик ва Чемпионлар лигаси сари қадам ташланди. Ишончим комилки, клуб футболчилари ва ходимлари сўнгги йиллардагидан кўра ҳозир бахтлироқ», — дейди Руни.