Ўзбекистонлик спортчи Сакина Мамедова эртага мусобақаларни бошлайди. У 10 метр масофада пневматик тўппончадан ўқ отишда иштирок этади. Сакина олимпиадага сўнгги тайёргарлик машғулотларини Англиянинг Саффолк шаҳри яқинида Феликстоу порт-шаҳарда олиб борди ва ўша ернинг ўзида ББС интернет сайтига интервью берди.

"Мен Ўзбекистонда машҳурман, аммо бу ерда мени ҳеч ким танимайди", дейди 7 июлдан бери ўз мураббийи Игорь Потапов билан Феликстоуда шуғулланаётган Сакина.

У ўқ отишнинг 2 тури — 10 метрдан пневматик тўппонча ва 50 метрдан милтиқдан (у ўз ичига 3 хил ҳолатни олади — тик туриб, тиззалаб ва ётиб) отиш билан шуғулланади.

"Бу ерда машғулот объектлари яхши ва инсонлар меҳмондўст. Денгиз ҳам яхши. Аммо мен унда чўмилмадим — сув ҳаддан ташқари совуқ. Жисмоний машғулот учун соҳилда юрдик".

"Мен Ўзбекистонда палов ва балиққа ўрганганман. Бу ерда эса балиқ, чипс (қовурилган картошка) танаввул қилдим. Улар менга ёқди", дейди Мамедова.

Феликстоудаги ўқ отиш клуб раиси ўринбосари Билл Бонд ҳисобланади. "Мен Буюк Британия паралимпия терма жамоасининг россиялик мураббийи Владимир Флимоновдан хат олдим. Ўз клубимиз сафида олимпиада иштирокчисига эга бўлишдан қувондик. Клубимиз иш кунлари кечаси ва дам олиш кунлари кундузи ишлайди. Аммо клуб вакиллари меҳмонлар учун бошқа пайтда ҳам келиб ишлашди. Улар Мамедованинг машғулотини кузатишди. Сакинанинг ишлаши, концентрацияси ва фидойилигидан кўп нарса олиш мумкин", дейди Бонд.

Сакина Мамедова Халқаро ўқ отиш федерацияси рейтингида Топ-50га кирмаган бўлса-да, у олимпиадада олтин медалга умид қилмоқда.