Ҳозирда Қатардаги жаҳон чемпионатида Португалия терма жамоаси сафида тўп сураётган “Порту” дарвозабони Диогу Кошта клубни тарк этиши мумкин.
"Челси" 23 ёшли футболчини келаси мавсум учун қўлга киритиш учун дастлабки алоқаларни ўрнатди, деб хабар беради A Bola Relevo нашрига таяниб. "Кўклар" асосий таркибдан жой учун Кепа Аррисабалага билан рақобат қиладиган Коштага жой бўшатиш учун дарвозабон Эдуард Мендини сотиб юбормоқчи. "Манчестер Юнайтед" ҳам Коштанинг тараққиётини диққат билан кузатиб бормоқда.
Қайд этилишича, португалиялик дарвозабоннинг агенти Хорхе Мендеш ёзда ўз тарбияланувчиси учун янги клуб топмоқчи ва “Порту” раҳбарияти бу режалардан аллақачон хабардор. Шу билан бирга, унинг шартномасида 75 миллион евро миқдоридаги товон пули мавжуд.
Кошта Қатарда бўлиб ўтган ЖЧ-2022да Португалия терма жамоаси сафида Ганага қарши (3:2) битта ўйин ўтказиб, иккита гол ўтказиб юборган.
“Порту” дарвозабони жорий мавсумда барча турнирларда 19 та ўйинда майдонга тушиб, 16 та гол ўтказиб юборди ва 9 та ўйинда ўз дарвозаси даҳлсизлигини сақлаб қолди.
