Украина Премьер-лигасининг 3-турида Ўзбекистон миллий терма жамоасига аъзо футболчилар ҳаракат қиладиган ҳар иккала клуб ўз ҳисобига 3 очко ёзиб қўйди.

Киевнинг «Арсенал» клуби ўтган мавсумни кучли бешликда якунлаб, Европа лигасида ўйнаш ҳуқуқини қўлга киритганди. Жорий йилги мавсум эса «тўпчилар» учун қийин бошланди. Бунга сабаб қилиб «Арсенал»га дастлабки икки турдаёқ чемпионлик учун асосий даъвогарлар – Донецкнинг «Шахтёр» ва Киевнинг «Динамо» клублари тўқнаш келганани кўрсатиш мумкин. Ва ниҳоят 3-турга келиб Максим Шацких жамоадошлари ўз ҳисобларига илк 3 очкони ёзиб қўйишди.

Луганскда «Заря» меҳмони бўлган «Арсенал» 3:1 ҳисобида ғалаба қозонди. 9-дақиқада Максим Шацких меҳмонларни олдинга олиб чиққан бўлса, 14-дақиқада унинг ўзи пенальтидан ҳисобни яна 1тага оширди. 20-дақиқага келибоқ «Арсенал» 3та гол фарқи билан олдинга чиқиб олганди. 24-дақиқада мезбонларнинг ҳисоб қисқартирувчи голи ўйиндаги якунийси бўлди.

Қайд этиш керак, киевликлар 3-турга қадар бирорта ҳам гол ура олишмаганди. Жамоанинг фаҳрий футболчиси Максим Шацких эса 3-турдаги дубли билан «Арсенал» голларини почин қилиб берди. «Заря» устидан қозонилган ғалаба «тўпчилар»ни турнир жадвалида 12-ўринга олиб чиқди. Маълумот ўрнида айтиш керакки, Луганск клуби бунга қадар ўтказилган иккита турда 6 очко эгасига айланганди.

Яна бир ўзбекистонлик Виталий Денисов тўп сураётган Днепропетровскнинг «Днепр» клуби 3-турдан кейин юз фоизлик натижа қайд этиб турибди. 3-турда Донецкнинг «Металлург» клубини қабул қилган «Днепр» 2:0 ҳисобида зафар қучди. Биринчи бўлимда Евгений Коноплянка томонидан қайд этилган дубл, мезбонларга ғалаба келтирди. Дастлабки икки турни тўлиқ ўтказган Виталий Денисов 74-дақиқада айнан учрашув қаҳрамони ўрнига майдонга туширилди.

3-турдан кейин «Шахтёр», «Днепр» ва «Динамо» клублари 9тадан очко билан пешқадамлик қилишмоқда. Премьер-лиганинг 4-тур ўйинлари 4 август куни бўлиб ўтади. Унда ўзбекистонлик футболчилар ҳаракат қилаётган «Арсенал» ва «Днепр» клублари Киевда ўзаро тўқнаш келишади.