“Навбаҳор” – “Машъал” жамоалари ўртасидаги учрашув якунига етгач, ҳар икки жамоа мураббийлари ўртасида матбуот анжумани бўлиб ўтди. Дастлаб, журналистларнинг саволларига меҳмонлар устози Владимир Фомичёв жавоб қайтарди.

Владимир Фомичёв (“Машъал” жамоаси бош мураббийи):
— Ўйин биз учун оғир кечди. Учрашувнинг аҳамияти ҳар икки жамоа учун муҳим бўлгани боис беллашув бироз асабий ўтди. Майдондаги воқеалар ривожи ҳам асосан марказда кечди. Бундай ҳолатда дарвозалар олдида хавфли вазиятлар кам юзага келтирилади. Шунга қарамай майдон эгалари кўпроқ ҳужумлар ташкил этишди. Ҳимояда позицион хатога йўл қўйганимиз учун дарвозамиздан тўп олиб чиқишга мажбур бўлдик. Афсуски шогирдларимнинг ҳужумдаги ҳаракатлари самарали чиқмади. Бутун ўйин мобайнида деярли бирорта ҳам хавфли вазият содир этмадик. Биринчи таймда қарши ҳужумда биргина қулай имконият туғилганди, аммо ундан фойдалана билмадик.

Иккинчи бўлимда эса фақатгина рақибни ҳимоядаги палапартишликларидан сўнг ўйин охирида вазиятни ўнглашга муваффақ бўлдик. “Навбаҳор” кўпроқ ғалаба қозонишни истаганди. Уларнинг тактик жихатдан ўйинлари ҳам яхши ташкил этилди. Сўнгги дақиқаларда рақиб ҳимоясига босим ўтказиш орқалигина дуранг натижага эришдик. Умуман олганда эса, бугун бизга омад кулиб боқди деб ўйлайман. Одатда қўшиб берилган дақиқаларда ўз дарвозамидан тўп ўтказиб юборардик. Биринчи даврада учта учрашувда худди шундай тарзда очколарни бой бергандик. Бугун илк бор сафарда иккита гол уришга эришдик. Тан олиш керак, майдон эгалари ғалабага яқин туришганди.