Криштиану Роналду ва унинг жамоаси чорак финалда Марокашга қарши мағлубиятга учраб, турнирни тарк этганди. Шундан сўнг, ҳаммада 37 ёшли ҳужумчининг терма жамоадан кетиши ёки қолиши билан боғлиқ саволлар пайдо бўла бошлади. Хабарларга кўра, Роналдунинг ўзи халқаро футболдан чекинмоқчи эмас ва Евро-2024да Португалия таркибида бўлмоқчи. У Португалия устози Фернанду Сантуш томонидан захирага михлаб қўйилганди. Бунга эса Криштианунинг Жанубий Кореяга қарши ўйиндаги хулқи сабаб бўлган. Натижада, Роналду Швейцария ва Марокаш билан ўйинларда захирада ўтиришга маҳкум бўлганди.
Баъзи собиқ футболчилар ва мухлислар Сантушнинг юқоридаги қарорини нотўғри деб ҳисоблаб, уни танқид остига олди. Орадан кўп ўтмай, Роналдуга Португалия ФА томонидан таҳдид қилингани ҳақида хабарлар тарқалди. Унда айтилишча, Роналду миллий терма жамоадан кетиши билан қўрқитилган. Аммо тез орада бу маълумотлар ёлғон экани Роналду ва Португалия футбол иттифоқи томонидан тасдиқланди. Шунга қарамай, Фернанду Сантуш матбуотга Роналдуни захирада қолдирганидан афсусда эмаслигини билдирди. У Марокашга қарши мағлубиятли ўйиндан кейин шундай деди:
"Афсусда эмасман. Ўйлашимча, бу жамоа Швейцария қарши фантастик ўйнаганди. Бу сафар ҳам шундай бўлиши керак эди. Роналдуга келсак, у ажойиб футболчи. Фақат биз ундан керак пайтда фойдаланмоқчи эдик".
Роналду аламли мағлубиятдан кейин Instagram тармоғидаги ўз саҳифасида пост қолдирганди. Бу пост кўпчиликка Португалиядаги Роналдунинг даври тугаганига ишорадек туюлди. Унда шундай дейилади: "Португалия сафида Жаҳон чемпиони бўлиш, фаолиятимдаги энг катта орзум эди. Омадим бор экан, мен клуб миқёсида кўплаб совринлар ютдим. Ҳатто, Португалияда ҳам. Аммо ўз юртим байроғини жаҳондаги энг катта турнирда юксакка кўтариш армонга айланди. Ҳа, мен бу учун курашдим. Бу орзуни амалга оширишга саъй қилдим. 16 йил мобайнида 5 та мунидал ўйинида гол урдим ва бу атрофимдаги аҳил жамоа ва ортимизда турган миллионлаб португалияликлар ёрдам билан амалга ошганди. Мен боримни бердим. Ҳар бир баҳсда майдонга боримни ташлаб кетдим. Мен ҳеч қачон курашдан юзимни бурмаганман. Бу менга хос эмас ва мен таслим бўлишни хоҳламадим. Ачинарлиси, кеча ўша орзуларим чилпарчин бўлди. Нима дейилмасин, нима ёзилмасин, қанча ғийбат бўлмасин, менинг Португалияга садоқатим ва фидокорлигим бир лаҳза ҳам ўзгармади. Доимо эришиш мумкин бўлган нарсалар томон ҳаракат қилганман. Мен ҳеч қачон ўз жамоадошларим ва юртимдан юз ўгирмаганман. Бундан ортиқ гапира олмайман. Раҳмат, Португалия. Сендан миннатдорман Қатар. Орзу орзулигида гўзал бўлади, армонга айланганида эмас. Бугун бир-биримизга далда бўлишимиз керак. Ўйлаш учун эса вақт талаб этилади".
Айнан юқорида айтилган гаплар Роналдуни Португалия терма жамоасидан кетади деган хулосаларга сабаб бўлди. Аммо Португалиянинг "CM Journal" нашри берган хабарда айтилишича, Роналду ҳали ҳам ўзини терма жамоага керакли деб билади ва таслим бўлмоқчи эмас. Ҳаттоки, Фернанду Сантуш жамоада қолса ҳам у давом этмоқчи. Ҳозирда Криштиану Роналду "МЮ"дан кетиб, ўзига янги клуб қидирмоқда. 2024 йилги Европа чемпионатига бориш учун эса унга бу нарса жуда ҳам керак.
ИСМАТОВ Ж.
