Хорватия терма жамоаси ярим ҳимоячиси Лука Модрич ЖЧ ярим финалида Аргентинага (0:3) қарши ўйиндаги ҳакамликдан норози.

Хорватияликлар биринчи голни 34-дақиқада Лео Месси томонидан пенальтидан киритилган гол эвазига ўтказиб юборди. Альварес эса кейинроқ иккита гол урди.

"Жуда ачинарлиси, биз финалда ўйнашга умид қилгандик, аммо энди ўзимизга келиб, учинчи ўрин учун ўйинда ғалаба қозониш мақсадида ҳамма нарсани қилишимиз керак. Аргентина терма жамоасини табриклайман.

Бизнинг дарвозамизга белгиланган пенальти - бугунги ўйинда бурилиш нуқтаси бўлди. Аввалига ҳакамлар бизнинг фойдамизга бурчак тўпини беришмади, кейин эса нотўғри пенальти белгилашди. Чунки, ўша вазиятда Альварес Ливаковичга урилганди. Афсуски, ўйин якунланди, биз энди ҳеч нарсани ўзгартира олмаймиз", – деди Модрич.