Хабарингиз бор, Ўзбекистон миллий терма жамоаси Жанубий Кореяга қарши ЖЧ-2014 саралаш баҳси олдидан (7 сентябрь) Тошкентда Кувайт билан ўртоқлик учрашувини ўтказиш борасида рақиб жамоа билан келишиб олган. Таиланд футбол федерацияси ЎФФга мактуб йўллаб, мазкур ўртоқлик ўйинни ФИФА тоифасидаги таиландлик ҳакамлар гуруҳи бошқариб бориш таклифини билдирган. Бу ҳақда ЎФФ матбуот котиби Санжар Ризаев ўз Твиттери маълум қилди.

Унинг ёзишича, Таиланд футбол федерацияси Бош котиби имзолаган мактубга кура, рефериларнинг сафари билан боғлиқ барча сарф-харажатларни Таиланд томони кўтаради. Таиланд футбол федерацияси ўз ҳакамлари фаолиятини ривожлантириш ва қўллаб-қувватлаш мақсадида ана шундай йўлдан боряпти. Қисқа қилиб айтганда, ҳакамларга халқаро ўйинлар амалиётини тақдим этиш — Федерациянинг асосий мақсадидир.

Демак, Ўзбекистон - Кувайт учрашувига тавсия қилинган ҳакамлар:
Бош ҳакам: Чайя Махараб
Ёрдамчи ҳакамлар: Таном Борикут, Тавип Инкаев
Захира ҳаками: Пратан Насаванг

Таиланд футбол федерацияси томонидан тавсия килинган Чайя Махараб шу йилнинг ўзида ўзбек жамоалари иштирокидаги 2 та учрашувни бошқарган. У 25 февраль куни ўтказилган Жанубий Корея-Ўзбекистон ўртоклик учрашуви ва 3 апрель куни бўлиб ўтган "Гамба Осака" ва "Бунёдкор" ўртасидаги ОЧЛ баҳсини бошқариб борган.