"Монако" марказий ҳимоячиси Бенуа Бадьяшиль яқинда "Челси"нинг янги футболчиси сифатида таништирилади.
21 ёшли футболчи бугун "Монако"нинг "Брест"га қарши ўйинида қайдномага киритилмади, чунки унинг "Челси"га ўтиш жараёни якунланиши арафасида. Фабрицио Романонинг сўзларига кўра, франциялик футболчи ҳозирги жамоадошлари билан хайрлашган.
Душанба куни у Лондонга учиб кетади ва тиббий кўрикдан ўтади, шундан сўнг "Челси" билан шартнома имзолайди. Трансфер нархи, аввал хабар қилинганидек, тахминан 38 миллион еврони ташкил қилади.