Англиянинг "Кристал Пэлас" ҳужумчиси Уилфрид Заа келаси ёзда бошқа жамоага ўтиши мумкин. Каталониянинг "Барселона" клуби 30 ёшли ивуарлик футболчининг хизматларига қизиқиш билдирмоқда, деб хабар бермоқда Sport.es.
Манбага кўра, "кўк-анорранглилар" ҳужумчини текинга қўлга киритишни истамоқда, чунки Заа келаси ёзда "Кристал Пэлас" билан янги шартнома борасида келиша олмаса эркин агентга айланади. "Барселона" Уилфридни Роберт Левандовски ўрнига ўринбосар сифатида кўрмоқда.
Олдинроқ Британия ОАВлари Заанинг "Кристал Пэлас" билан шартномасини узайтириш ниятида эмаслиги ва янги жамоа топишни режалаштираётгани ҳақида хабарлар тарқалганди. Премьер-лиганинг 2022/2023 йилги мавсумида Уилфрид 15 та ўйинда майдонга тушиб, 6 та гол урди ва 2 та голли узатмани амалга оширди. Transfermarkt портали 30 ёшли ивуарлик футболчининг нархини 32 миллион еврога баҳоламоқда.
