Италия футбол федерацияси расмий сайтида миллий чемпионатнинг 17-туридан ўрин олган барча ўйинлар 1990 йилги жаҳон чемпионати бронза медали совриндори Жанлука Виалли хотирасига бир дақиқалик сукут сақлаш билан бошланишини малум қилди.
Собиқ футболчи бугун, 6 январь куни ошқозон ости бези саратонидан вафот этди. Виалли 2017 йилдан бери касаллик билан курашиб келаётган эди. 2022 йил декабрь ойи охирида унинг аҳволи кескин ёмонлашди.
“Мен охиригача у яна бир мўъжиза кўрсатишига умид қилгандим. Унинг Италия футболи учун қилган ишлари ҳеч қачон унутилмайди. Жанлука ажойиб инсон эди ва у тўлдириб бўлмайдиган бўшлиқни қолдиради", - дея ташкилот президенти Габриэле Гравинанинг сўзларидан иқтибос келтиради Италия футбол федерацияси матбуот хизмати.
Виалли Италия терма жамоаси сафида 59 та ўйин ўтказиб, 1988 йилги Европа чемпионатида, 1990 йилги жаҳон чемпионатида бронза медалини қўлга киритган.
