Криштиану Роналду Европадаги фаолиятини якунлаб, Саудия Арабистонига йўл олгач, шу пайтгача унга тегишли бўлиб турган баъзи рекордлар "ПСЖ" форварди Лионель Месси томонидан янгиланиши мумкин. Уларни кўриб чиқамиз.

Европанинг топ-5 чемпионатларидаги голлар сони. Роналдуда — 696та
Криштиану бу голларни "Манчестер Юнайтед", "Реал" ва "Ювентус" клублари сафида урган. Мессида эса бу кўрсаткич — 695та! Лионель атиги битта гол урса, бу рекордни такрорлайди, агар 2та урса, мутлақ рекордчига айланади. Аргентиналик футболчи Франция чемпионатининг 18-тури доирасида 11 январь куни бўлиб ўтадиган «Анжер»га қарши учрашувда иштирок этиши кутилмоқда. Рекорд эртагаёқ янгиланиши мумкин.

Европа чемпионатларидаги голлар сони. Криштиануда — 701та
Роналду "Спортинг"даги фаолияти давомида Португалия чемпионатида 5та гол урган. Уни топ-5 чемпионатларидаги голларига қўшсак, 701тага етади. Бу рекорд ҳам узоқ сақланиб қолмаса керак. У катта эҳтимол билан жорий мавсумдаёқ янгиланади. Бунинг учун Месси Лига-1 доирасида яна 7та урса — кифоя.

Чемпионлар лигасидаги голлар сони. Роналдуда — 140та
Месси ушбу кўрсаткич бўйича Криштианудан 11та голга ортда қолмоқда — 129та гол. Лео Европада ўйнаб турса, 2-3 йилда ушбу натижани ҳам яхшилаш имкониятига эга.

Чемпионлар лигасида голли узатмалар. Криштиануда — 40та
Лионель ушбу натижани кейинги баҳсдаёқ янгилаши мумкин. Боиси, аргентиналик футболчида ЕЧЛда 40та голга ассистентлик қилган. Аммо парижликларнинг 1/8 финалдаги рақиби — "Бавария". Осон бўлмайди.