Мадриднинг “Атлетико”, “Интер” ва Бразилия терма жамоасининг собиқ ҳимоячиси Жоау Миранда ижтимоий тармоқ орқали футболчилик фаолиятини якунлаганини маълум қилди.

"Вақт келди. Мени қўллаб-қувватлаган барчага алоҳида раҳмат. Футболга катта раҳмат!”, — деб ёзади Миранда.

38 ёшли Миранда “Сан-Паулу” сафида уч карра Бразилия чемпиони ҳисобланади. "Атлетико" таркибида у Испания чемпиони, Испания кубоги ва Суперкубоги соҳиби, Европа лигаси ғолиби, УЕФА Суперкубоги ғолиби ва Чемпионлар лигаси финалчисига айланди. “Цзянсу Сунин” жамоасида тўп сурган ҳимоячи Хитой чемпионлигини қўлга киритди.

Миранда Бразилия терма жамоаси сафида Америка кубоги ғолиби ҳисобланади. У 2009 йилда терма жамоада дебют қилган, 58та ўйин ўтказиб, 3та гол урган.