Аргентиналик журналист Гилем Балагенинг сўзларига кўра, "Ал-Ҳилол" Лионель Мессига шартнома имзолаш таклифи билан чиқмаган.
Олдинроқ “Ал-Ҳилол” Мессига йилига 300 миллион евро маош таклиф қилишга тайёрлиги хабар қилинганди.
Балаге 2022 йилги жаҳон чемпионатида ғалаба қозонганидан кейин Месси фаолиятини Европада давом эттиришга қарор қилганини айтди. Аргентиналик футболчи Чемпионлар лигасида ўйнашда давом этмоқда ва "Олтин тўп" учун фаворит ҳисобланади.
"ПСЖ" ва Месси ёзда якунланадиган шартномани узайтириш учун келаси ҳафталарда учрашишни режалаштирмоқда.
Балагенинг қайд этишича, саудияликлардан ҳеч қандай таклиф бўлмаган, чунки “Ал-Ҳилол” раҳбарияти Месси юқори савияда ўйнашда давом этишни хоҳлаётганидан хабардор.
Жорий мавсумда аргентиналик футболчи 20 учрашувда 13 та гол урди ва 14 та голли узатмани амалга оширди.
