"Манчестер Юнайтед"нинг собиқ ҳужумчиси Эрик Кантона Криштиану Роналду ҳақида фикр билдирди. Фахрийнинг сўзларига кўра, португалиялик ҳужумчи фаолиятини якунлаётганини билиши керак.

"Менга ўхшаб эрта фаолиятини якунлаганлар ҳам, 40 ёшгача ўйнашга қарор қилганлар ҳам бор. Улар орасида иккита тур бор: ўзини ҳали 25 ёшда деб ўйлагани учун барча ўйинларда майдонга тушишни ҳоҳловчилар ва 25 ёшга тўлмаганлигини тушуниб, ёшларга ёрдам бериш учун келганлар.

Менимча Роналду 25 ёшли футболчиман деб ўйламоқда. У ёши каттароқ ва ҳамма ўйинларни ўйнай олмаслигидан норози бўлиш ўрнига: "Мен 25 ёшда эмасман, доим ўйнай олмайман, лекин ёшларга ёрдам бера оламан" дейиши керак эди.

Қаришни қабул қиладиган одамлар бор, бошқалари эса қабул қилмайди. Сиз буни фақат футболда эмас, ҳар бир ишингизда қабул қилишингиз керак. Мен 30 ёшимдагидек югура олмайман, буни қабул қилишим керак. Мен бир кун ўлишимни тан олишим керак. Бу қийин, лекин бу содир бўлади. Фаолиятимнинг охири ўлимга ўхшайди" - деди Кантона.