Ўзбекистон миллий терма жамоаси Миржалол Қосимовнинг қайта ташрифидан кейин биринчи ғалабасини қўлга киритди. Амманда Иордания меҳмони бўлган вакилларимиз қайсидир футболчининг ягона голи эвазига 1:0 ҳисобида муваффақият қозонишди.

Ўзбекистон футбол федерацияси терма жамоалар марказига отилган тошлар ҳеч қандай салмоққа эга эмас. Бироқ кўза кунда эмас, кунида синади. Чипталарни олиб-сотарлар қўлига тақдим этилиши ҳам, терма жамоаларнинг бир тийинга қиммат бўлган хориж йиғинларида иштирок этиши ҳам раҳбарларнинг кўзини очаётгани йўқ. Бугун ўзбек футболи учун этарли маблағ топиб берилмоқда. Бироқ уни сарфлайдиган кишилар...

Терма жамоалар маркази миллий терма жамоанинг ўйини учун ҳам матбуот хизматидан бирорта кишини жўнатмади. Натижада Иордания дарвозасига киритилган ягона голга Тимур Кападзе ёки Улуғбек Бақоевнинг муаллифлик қилганини аниқлаш яхшигина қийинчилик туғдирди. Толибжоновга саломлар... барча журналистлар ва мухлислар номидан.

Узунқулоқ гапларга қараганда, Ўзбекистон миллий терма жамоаси Амманга Тошкент-Деҳли-Манама-Амман рейси орқали йўл олган. Тушунишимизча, агар Тошкент-Куала-Лумпур-Истанбул-Жакарта-Токио-Сеул-Амман рейси арзонроқ бўлганида, терма жамоалар маркази бундан ҳам қайтмаган бўларди. Толибжоновга саломлар...

Кеча “Футбол шарҳи” кўрсатувида чиқиш қилган терма жамоалар марказининг собиқ раҳбари Алишер Никимбаев ҳозирги раҳбариятнинг иши тўғри ёки нотўғри экани борасида фикр билдиришни истамади. Бу эса бир қатор ишлар нотўғри йўлга қўйилганидан даолат эмасми? Толибжоновга саломлар...

Яна бир бор такрорлаймиз, кўза кунда эмас, кунида синади. Профессионал ташкилот учун эски қарашлари билан машғур кишилар эмас, профессионал ходимлар керак... Толибжоновга саломлар...