Мадриднинг “Реал” клуби қанот ҳимоячиси Дани Карвахалга ўринбосар қидирмоқда. El Nacional хабарига кўра, "қироллик" клуби эътиборини Англия трансфер бозорига қаратган. "Манчестер Сити"дан португалиялик Жоау Канселу испан грандининг қизиқиш доирасига тушди.

Манбага кўра, бу келишув жорий мавсум охирида расмийлаштирилиши мумкин. Канселу ўз навбатида инглиз клубидаги ўрнидан норози ва жамоани ўзгартиришга тайёр.

Жоаунинг "Манчестер Сити" билан шартномаси 2027 йилнинг ёзига қадар тузилган. Унинг трансфер нархи 70 миллион евро.

Англия чемпионатининг жорий мавсумида португалиялик футболчи 17 та ўйин ўтказиб, 2 та гол урди ва битта голли узатмани амалга оширди.