Сўнгги йилларда ЎФА президенти Абдусалом Азизов бошчилигида футболимиздаги келишилган ўйинлар, тотализатор каби иллатларга қарши курашиш борасида кўплаб амалий ишлар қилинди. Келаётган мавсумда ҳам ЎФА раҳбарияти томонидан клубларга ҳалол ўйин принципларига риоя қилиш борасида қатъий талаблар қўйилган.
Янги мавсум олдидан ЎФА махсус инспекцияси мутасаддилари ҳудудларда бўлиб, жамоалар вакиллари иштирокида семинарлар ўтказишмоқда. Дастлабки семинар «Андижон» футбол клуби билан бўлиб ўтди. Унда ЎФА махсус инспекцияси раҳбари Дилшод Ҳакимов ва махсус инспекция мутахассиси Абдужалил Пардиев иштирок этишди.
Маълумки «Андижон» жамоаси Про лигада ёрқин ўйинлар кўрсатиб, дивизион ғолибига айланди ва Суперлига йўлланмасини қўлга киритди. Янги мавсумда ўз тарихига эга ушбу клуб мавқейини юқори даражада сақлаб қолиши учун келишилган ўйинларга йўл қўймаслик зарурлиги, унинг салбий оқибатлари ва қўлланиладиган кескин чоралар ҳақида тушунчалар берилди. Клуб раҳбарияти, мураббийлар ва футболчиларга мавзуга оид маълумотлар тақдим этилди.
