“Андижон” клубининг Анталияда давом этаётган йиғинига янги футболчилар қўшилишда давом этяпти. Жамоа сафини тўлдирган навбатдаги янги футболчи – тожикистонлик тажрибали ўйинчи Ахтам Назаров.

Клуб вакиллари Анталия аэропортида футболчини кутиб олдилар ва “Asteria Kremlin Palace” меҳмонхонасида “Андижон” бош директори Улуғбек Мирзаев бошчилигидаги раҳбарият футболчи билан бир пиёла чой устида суҳбатлашдилар.

Қанот ҳимоячиси Ахтам Назаров Тожикистон миллий терма жамоасининг сардори ва етакчиси саналади. 2012 йилдан буён мамлакатнинг бош жамоаси учун ўйнаб келмоқда. Ҳозирга қадар терма жамоа либосида 60 га яқин учрашувларда майдонга тушиб, 5 та гол урган.

Шунингдек, Назаров Тожикистоннинг биринчи рақамли клуби – “Истиқлол” сафида узоқ йиллардан бери тўп суриб келган. Табиийки, фаолияти давомида бир қанча совринларни қўлга киритган.

Тез орада футболчи билан шартнома имзоланади.

“Андижон” матбуот хизмати.