"Челси" ҳали "Бенфика"дан Энцо Фернандесни сотиб олганини расман эълон қилмаган. Бироқ Лондон клуби матбуот хизмати бу тез орада амалга ошишига шама қилган.

"Челси"нинг Twitter'даги расмий саҳифаси тавсифида Аргентина байроғи ва Чемпионлар кубоги эможиси пайдо бўлди. Ўтган йилнинг декабрь ойида Энцо Аргентина терма жамоаси сафида жаҳон чемпиони бўлганди.

Олдинроқ Лондон клуби 22 ёшли аргентиналик учун 120 миллион евро тўлаши, бу АПЛ рекорди бўлиши маълум бўлганди. Футболчи билан 2031 йилгача мўлжалланган шартнома имзоланади.

Энцо жорий мавсумда барча турнирларда 29 та ўйинда майдонга тушиб, 4 та гол урди ва 7 та голли узатмани амалга оширди.