Ярим ҳимоячи Темуе Бакайоко «Милан»да ушбу мавсумни якунлайди, дея хабар беради инсайдер Жанлука ди Марцио.
Манба берган хабарга кўра, қишки трансфер ойнасида уни қўлга киритишга уринган Туркиянинг «Адана Демирспор» клуби якунда муваффақиятсизликка учраган. Шунингдек, Бакайоко ўзига қизиқиш билдирган «Кремонезе»га ўтмади.
Қайд этилишича, 28 ёшли ярим ҳимоячи жорий мавсумда жамоасига ёрдам бериш учун «Милан»да қолишга қарор қилган.
Бакайоко 2021 йилнинг июнидан бери ижара асосида «Милан»да ўйнамоқда, келишув 2023 йилнинг июнигача амал қилади.
